Rossiyaning Kiyev viloyatiga hujumi oqibatida 37 kishi halok bo‘ldi
Bucha tumanidagi o‘q-dorilar omboriga berilgan zarba ortidan yuzaga kelgan portlashlarda yana 42 kishi jarohatlangan.
Rossiyaning Kiyev viloyati Bucha tumanidagi o‘q-dorilar omboriga bergan zarbasi va undan keyingi portlashlar oqibatida kamida 37 kishi halok bo‘ldi. Yana 42 kishi jarohatlangan, ulardan to‘rt nafari bola. Bu haqda Kiyev viloyati davlat ma’muriyati rahbari Timur Tkachenkoga tayanib, BBC xabar berdi.
Halok bo‘lganlarning 34 nafari qariyalar pansionatida bo‘lgan. Qurbonlar orasida Dmitrivka jamoasi rahbari Taras Didich ham bor.
Ukraina prezidenti Vladimir Zelenskiy hodisani odamlar yaqinida portlovchi moddalarni saqlash bilan bog‘liq “dahshatli beparvolik” deb atadi. Uning so‘zlariga ko‘ra, Rossiya hujumi vaqtida o‘q-dorilar saqlanadigan hududga zarba berilgan va buning ortidan snaryadlar, minalar, boshqa o‘q-dorilar hamda dronlar detonatsiyasi yuz bergan.
Ukraina rasmiylari 29-avgustga o‘tar kechasi Bucha tumanidagi Milya qishlog‘ida joylashgan korxonalardan birida hujum ortidan kuchli yong‘in va portlashlar yuz berganini bildirdi. Favqulodda vaziyat hududidan qariyb 400 kishi evakuatsiya qilingan. Portlashlar sabab Jitomir trassasining 15–32-kilometrlari oralig‘idagi qismida transport harakati to‘liq to‘xtatilgan.
Rossiya Mudofaa vazirligi esa Milya qishlog‘ida Fire Point kompaniyasining o‘q-dorilar ombori zarbaga uchraganini ma’lum qildi. Vazirlik ma’lumotiga ko‘ra, u yerda FP-1 va FP-2 uzoq masofaga uchuvchi dronlar uchun butlovchi qismlar va start tezlatkichlari saqlangan.
Portlashlar oqibatida atrofidagi infratuzilmaga, jumladan, turar joylar va qariyalar pansionatiga zarar yetgan. Qariyb 50 ta turar joy binosi turli darajada shikastlangan.
Hodisa yuzasidan Ukraina Milliy politsiyasi va Ukraina Xavfsizlik xizmati sudgacha tergov olib bormoqda. O‘q-dorilarni aholi yashaydigan hudud yaqinida saqlashga yo‘l qo‘ygan mansabdor shaxslarga nisbatan xizmat vazifalariga beparvolik bilan munosabatda bo‘lish moddasi bo‘yicha jinoyat ishi qo‘zg‘atilgan.
Ukraina prezidenti Volodimir Zelenskiy odamlarning o‘limiga sabab bo‘lgan qarorlar uchun aybdorlar “javobgarlikka tortilishi kerak”ligini ta’kidladi.
Ukraina Qurolli kuchlari Harbiy-havo kuchlari ma’lumotiga ko‘ra, 29-avgustga o‘tar kechasi Rossiya Ukraina hududiga “Oniks” kemaga qarshi raketasi, “Iskander-M” ballistik raketasi va 267 ta hujumchi dron uchirgan. 29-avgust soat 11:30 holatiga ko‘ra, “Shahed” dronlarining Kiyev viloyatiga hujumi davom etgan.
