Vashingtonda 1-sentabr “O‘zbekiston Mustaqilligi kuni” deb e’lon qilindi
Tegishli deklaratsiya shahar meri Muriel Bouzer tomonidan imzolangan.
AQSh poytaxti Vashington meri Muriel Bouzer 1-sentabrni shaharda “O‘zbekiston Mustaqilligi kuni” sifatida e’lon qiluvchi maxsus deklaratsiyani imzoladi. Bu haqda O‘zbekistonning AQShdagi elchisi Furqat Siddiqov o‘zining ijtimoiy tarmoqdagi sahifasida ma'lum qildi.
Hujjatda O‘zbekiston Mustaqilligi kunining ahamiyati, shuningdek, AQSh O‘zbekiston mustaqilligini birinchilardan bo‘lib tan olgan davlatlardan biri ekani qayd etilgan.
Deklaratsiyada O‘zbekiston bu yil o‘z mustaqilligining 35 yilligini nishonlayotgani ta’kidlangan. 1-sentabr sanasi o‘zbek xalqining boy madaniy merosi, erishgan yutuqlari va xalqaro hamjamiyatdagi nufuzini e’tirof etish kuni sifatida qayd etilgan.
Vashington meri AQShdagi O‘zbekiston diplomatik vakolatxonasi bilan hamkorlik aloqalarini ham alohida e’tirof etdi. Elchi Furqat Sidiqov boshchiligidagi diplomatik korpus Vashington bilan yaqin hamkorlik qilib, shaharning ta’lim va madaniy xilma-xilligini rivojlantirishga hissa qo‘shayotgani qayd etilgan.
“2026-yil 1-sentabri Vashington va Kolumbiya okrugida «O‘zbekiston Mustaqilligi kuni» deb e’lon qilinadi”, deyiladi deklaratsiyada.
Avvalroq AQShning Sietl shahri meri ham 1-sentabrni O‘zbekiston Mustaqilligi kuni sifatida nishonlashga bag‘ishlangan hujjatni imzolagan edi.
