Shavkat Mirziyoyev maktab o‘quvchilari, ustoz va ota-onalarni Bilimlar kuni bilan tabrikladi
Davlat rahbari yangi o‘quv yili ta’lim tizimida yangi ma’rifiy yuksalish yili bo‘lishiga umid bildirdi.
O‘zbekiston Prezidenti Shavkat Mirziyoyev O‘zbekiston mustaqilligining 35-yillik qutlug‘ bayramiga uyg‘un va hamohang holda o‘tayotgan Bilimlar kuni bilan maktab o‘quvchilari, ustoz-murabbiylari va ota-onalariga tabrik yo‘lladi.
“Yangi o‘quv yili mamlakatimizning butun ta’lim tizimida, maktab, litsey, texnikum va oliygohlarimiz hayotida yangi ma’rifiy yuksalish yili bo‘lsin!” — dedi Prezident.
Prezident maktab ta’limidagi islohotlar natijasida Yangi O‘zbekiston maktablari yangicha qiyofa kasb etib, ta’lim sifati takomillashib borayotganini ta’kidladi. U o‘qish, kasbiy ta’lim, IT, ijod, sport va jamoat ishlarida yutuqlarga erishayotgan yoshlarni mamlakatning “nurli kelajagi, oltin fondi” deb atadi.
“Bunday bilimli, zukko, tirishqoq va intiluvchan, saflari yil sayin kengayib borayotgan farzandlarimiz timsolida biz Uchinchi Renessans nihollarini ko‘ramiz”, — dedi Shavkat Mirziyoyev.
Prezident ta’lim-tarbiya sohasini rivojlantirishga bundan buyon ham ustuvor ahamiyat qaratilishini ma’lum qildi. Uning qayd etishicha, maktabni tamomlayotgan yoshlar puxta bilim bilan birga kamida bitta zamonaviy kasb-hunarni egallashi uchun sharoitlar yaratiladi. Shu maqsadda hududlarda “Kasblar shaharchalari” tashkil etilib, ularga zamonaviy tajriba va ilg‘or mutaxassislar jalb etiladi.
Shuningdek, davlat rahbari yoshlarni yangi bilim, g‘oya va innovatsiyalar, kasb-hunarlar, ona tili, tarix va madaniyatni puxta egallashga, jahon tarixi va xorijiy tillarni o‘rganishga chaqirdi.
“Aziz farzandlarim, sizlarga baxtli va saodatli hayot eshiklarini ochadigan kalit ham, umr yo‘llaringizda paydo bo‘ladigan murakkab savollarning yechimi, sinov va mashaqqatlarni yengib o‘tishning kafolati ham faqat bilim, bilim va bilimdir”, — dedi Prezident.
Shavkat Mirziyoyev o‘quvchilarga yangi o‘quv yilini a’lo baholar bilan boshlash, choraklarni muvaffaqiyatli yakunlash, sihat-salomatlik, omad va zafar tiladi.
Ma’lum qilinishicha, bu yil mamlakat maktablari ostonasidan 800 ming nafarga yaqin o‘g‘il-qiz yangi o‘quv yilini boshlamoqda.
