Farg‘onadagi ko‘p qavatli uy yerto‘lasida akula emas, Siam somi boqilgani aniqlandi
Holat Farg‘ona viloyati Ekologiya va iqlim o‘zgarishi bosh boshqarmasi tomonidan o‘rganildi.
Ijtimoiy tarmoqlarda Farg‘ona viloyatidagi ko‘p qavatli uylardan birining yerto‘lasida akula boqilayotgani haqida xabarlar tarqaldi. Holat Farg‘ona viloyati Ekologiya va iqlim o‘zgarishi bosh boshqarmasi tomonidan joyiga chiqib o‘rganildi.
O‘rganish natijasida Farg‘ona shahri “Muruvvat” MFYda yashovchi fuqaro T.M. tomonidan akula emas, balki Siam somi balig‘i boqilayotgani ma’lum bo‘ldi.
Fuqaroning aytishicha, internetda ko‘p qavatli uy yerto‘lasida akula boqilayotgani haqida noto‘g‘ri xabar tarqalgan. U buning uchun uzr so‘rab, baliqlarni hozirda yerto‘lada emas, uyining hovlisiga joylashtirganini bildirgan.
Ma’lumot uchun, Siam somi balig‘i akvarium balig‘i hisoblanadi. Tashqi ko‘rinishi akulaga o‘xshaganligi sababli “akulasimon som” yoki “akuliy som”, shuningdek, Pangasius nomi bilan ham tanilgan.
