Nepalda suv toshqinlari oqibatida yetkazilgan zarar 2,56 mlrd dollardan oshdi
Zarar miqdoriga uy-joylar, mulk va infratuzilma obyektlarining vayron bo‘lishi bilan bog‘liq yo‘qotishlar kiritilgan.
Nepalda yuz bergan vayronkor suv toshqinlari mamlakat mulki, uy-joylari va infratuzilmasiga kamida 2,56 milliard dollar miqdorida zarar yetkazgani qayd etildi. Bu haqda Reuters Nepal Milliy ofatlar xavfini kamaytirish va boshqarish boshqarmasi rahbari Dharma Raj Upretiga tayanib xabar berdi.
Uning ma’lum qilishicha, tabiiy ofat mamlakatning zamonaviy tarixidagi eng vayronkor suv toshqinlaridan biri bo‘lgan. Zarar miqdoriga uy-joylar, mulk va infratuzilma obyektlarining vayron bo‘lishi bilan bog‘liq yo‘qotishlar kiritilgan.
Hisob-kitoblarga ko‘ra, dastlabki to‘rt oy davomida tiklash va qayta qurish ishlari uchun qariyb 52,6 million dollar mablag‘ talab etiladi. Ushbu mablag‘larni yo‘llarni tiklash, vaqtinchalik boshpanalar qurish, elektr ta’minotini qayta tiklash hamda aholiga ichimlik suvi yetkazib berishga yo‘naltirish rejalashtirilgan.
Eslatib o'tamiz, suv toshqini 26-avgust kuni Nepalning shimoliy qismida, Xitoy bilan chegaraga yaqin hududda yuz bergan edi. Dastlabki ma’lumotlarga ko‘ra, Rasuvagadhi chegara punktidan taxminan 20 kilometr shimoli-sharqda yuzaga kelgan ko‘chki ortidan kuchli sel oqimi paydo bo‘lgan.
Tosh va loy aralashmasidan iborat oqim daryo o‘zani bo‘ylab 70 kilometrdan ortiq masofani bosib o‘tib, aholi punktlariga zarar yetkazgan va katta hududlarni suv ostida qoldirgan.
Tabiiy ofat oqibatida qurbonlar va bedarak yo‘qolganlar soni bo‘yicha ma’lumotlar aniqlashtirilmoqda. Zarar ko‘rgan hududlarda qutqaruv va tiklash ishlari davom etmoqda.
Rasmiylarning ta’kidlashicha, zarar ko‘lami hali to‘liq baholanmagan. Shu sababli tabiiy ofat oqibatida yetkazilgan zararning yakuniy miqdori o‘rganishlar yakunlangach ma’lum bo‘ladi.
