“Bir-birini qutqarmoqchi bo‘lishgan”

Toshkent viloyati Bo‘stonliq tumanidagi Chorvoq suv omborida 2-sentyabr kuni cho‘kib ketgan ota va uning ikki o‘g‘lini qidirish ishlari davom etmoqda. Favqulodda vaziyatlar vazirligi 6-sentyabr kuni qidiruv ishlari hali yakunlanmaganini ma’lum qildi.

 

Vazirlik ma’lumotiga ko‘ra, hodisa joyida qutqaruvchilar va g‘avvoslardan iborat katta guruh ishlamoqda. Qidiruv ishlari sutka davomida uzluksiz olib borilmoqda.

 

Dastlabki ma’lumotlarga ko‘ra, bir oila Chorvoq suv omborida katerda sayr qilgan. Ular cho‘milish taqiqlangan hududda suratga tushish uchun to‘xtagan va keyinchalik cho‘milishga qaror qilgan.

 

Qutqaruv otryadi komandiri Rustam Bo‘riyevning aytishicha, cho‘milish vaqtida oila a’zolari qutqaruv jiletlaridan foydalanmagan. Suvda shamol va to‘lqin bo‘lgan paytda birinchi bo‘lib suvga tushgan o‘g‘ilning oyog‘i tortishib qolgan. Uni qutqarish uchun otasi, keyin esa ikkinchi o‘g‘li suvga tushgan. Natijada uchalasi ham cho‘kib ketgan.

 

Katerni boshqarayotgan haydovchi fuqarolarni jiletsiz cho‘milmaslik haqida ogohlantirgan. Biroq ular tavsiyaga amal qilmagan.

 

Hodisa vaqtida katerda erkakning turmush o‘rtog‘i va singlisi ham bo‘lgan. Ayollar yordam so‘ragan. Kater haydovchisi ham suvga tushib, ularni qutqarishga uringan, biroq uch kishini qutqarishning imkoni bo‘lmagan.

 

“Hozirgi vaqtda beshta qutqaruv otryadi jalb qilingan. Suvda yettita qutqaruv brigadasi qidiruv-qutqaruv ishlarini amalga oshirmoqda. Vazirimizning topshirig‘iga asosan, Sirdaryo va Jizzax viloyatlaridan qutqaruv otryadlari jalb qilingan. Ko‘rib turganimizdek, maxsus shtab tashkil qilingan. Barcha vazirlik rahbariyati, qo‘shimcha hamkor xizmatlar qidiruv ishlarini amalga oshirilyapti. Xudo xohlasa, tez fursatlarda shu cho‘kkan fuqarolarni topishga erishamiz”, deydi qutqaruvchi.