Lavrov Germaniyani Rossiyaga qarshi “haqiqiy urush boshlash”da aybladi
Germaniyaning Rossiya maxsus xizmatlarini Leypsig/Halle aeroportidagi dron hujumiga aloqadorlikda ayblagani Lavrovning tanqidiga sabab bo‘ldi.
Rossiya tashqi ishlar vaziri Sergey Lavrov Germaniyani Rossiyaga qarshi “haqiqiy urush boshlash”da aybladi. U Germaniya hukumatining Rossiya maxsus xizmatlarini Leypsig/Halle aeroportidagi portlovchi moddalar ortilgan dron hujumiga aloqadorlikda ayblaganidan keyin Berlinni keskin tanqid qildi.
“Umuman olganda, bu katta ma’noda haqiqiy urushning boshlanishi. Bonndagi bosh konsullikni haydab chiqarishdi... Berlindagi Rossiya uyini yopishmoqda. Ikkinchi jahon urushi, to‘g‘rirog‘i, Ulug‘ Vatan urushi boshlanishidan oldin nemislar ham o‘z diplomatik vakolatxonalarini yopganini eslayman... Ular yana urushni xohlamoqda”, — dedi Lavrov Rossiya davlat televideniyesiga bergan intervyusida.
Rossiya TIV rahbari Germaniya kansleri Fridrix Merzni ham tanqid qildi. Lavrovning ta’kidlashicha, kansler “Rossiyaga urush e’lon qilish uchun” harakat qilmoqda.
“Tarix saboqlari umuman o‘zlashtirilmagan. Ma’lum bo‘lishicha, neonatsizm metastazlari o‘zini ko‘rsata boshlamoqda. Bu xavfli hodisa. Menimcha, Rossiya rahbariyati tegishli xulosalar chiqaradi”, — dedi u.
O‘z navbatida, Merz Moskvaning ayblovlarini rad etdi. Germaniya kansleri mamlakat maxsus xizmatlarining Rossiyaning hujumga aloqadorligi haqidagi xulosalari “juda aniq, shubhasiz va sudda qo‘llash uchun yaroqli” ekanini bildirdi.
Uning so‘zlariga ko‘ra, Germaniya rasmiylari dalillarni tekshirish uchun ataylab qariyb to‘rt hafta vaqt sarflagan.
