Qishloq tumanlarida ehtiyojmandlarni ishga olgan korxonalar uchun ijtimoiy soliq 2 foiz bo‘ladi

Prezident Shavkat Mirziyoyev raisligida hududlarda aholi bandligi va daromadlarini oshirish bo‘yicha amalga oshirilayotgan ishlar muhokama qilindi.

 

Yig‘ilishda 3-sentyabr kuni o‘tkazilgan videoselektor yig‘ilishida belgilangan vazifalar ijrosi, hududlardagi shtablar faoliyati hamda mavjud imkoniyatlardan foydalanish holati tanqidiy tahlil qilindi.

 

Xususan, foydalanilmayotgan ishlab chiqarish quvvatlarini ishga tushirish orqali bandlikni oshirish imkoniyatlari ham ko‘rib chiqildi.

 

Jumladan, Qo‘shko‘pir tumanida 43 million yevroga qurilgan va 1,3 mingta ish o‘rniga mo‘ljallangan to‘qimachilik korxonasining yil boshidan buyon ishlamayotgani tanqid qilindi. Korxonani bank tomonidan krizis-menejer jalb etish orqali to‘liq quvvatda ishga tushirish mumkinligi qayd etildi.

 

Shuningdek, 124 ta korxonaning 6 trillion so‘mlik aktivlariga qo‘yilgan cheklovlarni qayta ko‘rib chiqish va ularni bank boshqaruviga berish orqali 10 mingta ish o‘rnini tiklash mumkinligi aytildi.

 

Oqoltin tumanidagi “Oqoltin mega tekstil” korxonasi misolida banklar balansiga o‘tgan tayyor obyektlarni qismlarga bo‘lib sotish o‘rniga qayta ishga tushirish orqali yuzlab odamlarni ish bilan ta’minlash mumkinligi ko‘rsatib o‘tildi.

 

Umuman, davlat banklari balansida 10 trillion so‘mlik qariyb 2,5 mingta mol-mulk mavjud. Ularni samarali ishga solish orqali 40 mingtagacha ish o‘rnini tiklash imkoniyati bor.

 

Mutasaddilarga bir hafta muddatda qarzdorlik sabab banklar balansiga o‘tgan korxonalarni to‘liq xatlovdan o‘tkazish topshirildi. Yil yakuniga qadar ushbu obyektlarni yaxlit ishlab chiqarish sifatida sotish yoki menejer tayinlab, faoliyatini qayta tiklash choralari ko‘riladi.

 

Bundan tashqari, qishloq tumanlarida ehtiyojmand oilalar a’zolarini ishga qabul qilgan korxonalar uchun 1-oktyabrdan ushbu xodimlar bo‘yicha ijtimoiy soliq stavkasi 2 foiz etib belgilanadi.