Ekopolitsiya xodimi o‘limi: uch nafar shaxsga jinoyat ishi qo‘zg‘atildi
Ekopolitsiya inspektori Sirdaryo daryosi o‘zanida o‘tkazilgan tezkor reyd davomida xizmat vazifasini bajarish vaqtida halok bo‘lgan edi.
Sirdaryo daryosida xizmat vazifasini bajarish vaqtida halok bo‘lgan Ekopolitsiya xodimi Mirzo Botirov ishi yuzasidan uch nafar shaxsga jinoyat ishi qo‘zg‘atildi.
Bu haqda Bosh prokuratura matbuot kotibi Hayot Shamsutdinov ma’lum qildi.
Ekologiya va iqlim o‘zgarishi milliy qo‘mitasi huzuridagi Davlat ekologik nazorat inspeksiyasi (Ekopolitsiya) Aydar-Arnasoy ko‘llar tizimini nazorat qilish bo‘limi bosh mutaxassisi Mirzo Botirov 9-sentabr kuni Sirdaryo daryosi o‘zanida o‘tkazilgan tezkor reyd tadbiri davomida halok bo‘lgan edi.
Dastlabki ma’lumotlarga ko‘ra, inspektor elektr qarmoqdan foydalanib, noqonuniy baliq ovlayotgan shaxslarning qarshiligiga uchragan va buning oqibatida suvga tushib ketgan.
10-sentabr kuni tegishli tashkilotlar bilan hamkorlikda olib borilgan qidiruv ishlari natijasida Mirzo Botirovning jasadi topilgan.
Mazkur holat yuzasidan uch nafar shaxsga nisbatan Jinoyat kodeksining 202-moddasi (Hayvonot yoki o‘simlik dunyosidan foydalanish tartibini buzish), 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) hamda 102-moddasi (Ehtiyotsizlik orqasida odam o‘ldirish) bilan jinoyat ishi qo‘zg‘atilgan.
Gumonlanuvchilar ushlangan. Hozirda dastlabki tergov harakatlari olib borilmoqda.
