Браконьерлар қаршилиги: инспектор ҳалок бўлди
Марҳум "Табиат ҳимоячиси" кўкрак нишони билан тақдирланади.
Экология ва иқлим ўзгариши миллий қўмитаси Давлат экологик назорат инспекциясининг Сирдарё сув ҳавзасини назорат қилиш бўлими ходими Мирзо Ботиров хизмат вазифасини бажариш вақтида ҳалок бўлди.
Маълум қилинишича, у 9-сентябрь куни соат 23:00 атрофида Сирдарё дарёси ўзанида ўтказилган тезкор рейд тадбирида электр қармоқ ёрдамида ноқонуний балиқ овлаётган ҳуқуқбузарларнинг қаршилигига учраган. Натижада инспектор сувга тушиб кетган.
Тегишли ташкилотлар ҳамкорлигида олиб борилган қидирув ишлари натижасида Мирзо Ботировнинг жасади 10-сентябрь куни топилган.
Қўмита маълумотига кўра, ҳозирда марҳумнинг оила аъзоларига зарур моддий ва маънавий кўмак кўрсатиш, шунингдек, воқеанинг барча тафсилотларини ўрганиш бўйича чоралар кўрилмоқда.
Мирзо Ботировнинг атроф-муҳитни муҳофаза қилиш ва экологик қонунчилик талабларини таъминлаш йўлидаги хизматлари ҳамда жасорати муносиб баҳоланиб, марҳум "Табиат ҳимоячиси" кўкрак нишони билан тақдирланади.
