Prezident Shavkat Mirziyoyev turizm sohasi xodimlariga tabrik yo‘lladi

27-sentyabr — Butunjahon turizm kuni munosabati bilan yo‘llangan tabrikda davlat rahbari sohadagi barchaga sihat-salomatlik, baxt-saodat, sharafli faoliyatida omad va zafarlar tiladi.

 

Prezident Shavkat Mirziyoyev O‘zbekistonda turizm sohasini rivojlantirish bo‘yicha yangi rejalarni ma’lum qildi.

 

Davlat rahbari 2025-yilda O‘zbekistonga kelgan xorijiy sayyohlar soni 2016-yilga nisbatan qariyb 6 barobar oshib, 12 million nafarga yaqinlashganini bildirdi. Turizm xizmatlari eksporti esa 11 karra ko‘payib, 4,8 milliard dollarni tashkil etgan.

 

Ta’kidlanishicha, O‘zbekiston tashabbusi bilan BMT Bosh Assambleyasi 2027-yilni Xalqaro barqaror va yashovchan turizm yili deb e’lon qilgan. BMT Turizm tashkiloti esa mamlakatni dunyodagi eng tez o‘sayotgan beshta sayyohlik yo‘nalishidan biri sifatida kiritgan.

 

Kelgusida Xivada xalqaro turistik shaharcha, kongress markazi va tarixiy-etnografik bog‘ barpo etiladi. Ichanqal’ani raqamli texnologiyalar asosida “aqlli” muzey-majmuaga aylantirish rejalashtirilgan.

 

Samarqandda Ipak yo‘li muzeyi tashkil etiladi. Qoraqalpog‘istonda arxeologik yodgorliklar bo‘ylab yangi turistik yo‘nalishlar ochiladi. Shuningdek, Qashqadaryoning Shahrisabz tumanida “G‘ilon”, Namanganning Pop tumanida “Arashan” kabi yangi majmualar tashkil etilishi ko‘zda tutilgan.

 

Prezident turizmda zamonaviy texnologiyalarni keng joriy etish, yagona milliy turizm platformasini ishga tushirish va sayyohlik xizmatlarini yagona tizimga birlashtirish ham muhim vazifa ekanini qayd etdi.

 

2030-yilgacha xorijiy sayyohlar sonini yiliga 20 million nafarga yetkazish, turizmning yalpi ichki mahsulotdagi ulushini 7 foizga chiqarish, turizm xizmatlari eksportini 8 milliard dollardan oshirish hamda yuqori toifadagi mehmonxonalar sonini ikki barobar ko‘paytirish maqsad qilingan.

 

Shuningdek, Shavkat Mirziyoyev “O‘zbekiston Respublikasida xizmat ko‘rsatgan turizm xodimi” faxriy unvonini ta’sis etish taklifini bildirdi.