B2 sertifikati yo‘q o‘qituvchilar ishdan olinmaydi: vazirlikdan yangi ko‘rsatma

 

O‘zbekistondagi maktablarda faoliyat yuritayotgan, ammo kamida B2 darajadagi milliy yoki unga tenglashtirilgan xalqaro sertifikatga ega bo‘lmagan xorijiy til o‘qituvchilari hozircha ishlashni davom ettiradi.

 

Bu haqda Maktabgacha va maktab ta’limi vazirligi tomonidan Qoraqalpog‘iston Respublikasi Maktabgacha va maktab ta’limi vazirligi, viloyatlar hamda Toshkent shahar maktabgacha va maktab ta’limi boshqarmalariga yuborilgan ko‘rsatma xatida ma’lum qilingan.

 

Unga ko‘ra, ayni vaqtda B2 darajadagi sertifikatga ega bo‘lmagan xorijiy til o‘qituvchilari bilan mehnat shartnomasini bekor qilish bo‘yicha talab qo‘llanmaydi.

 

Avvalroq jamoatchilik muhokamasiga qo‘yilgan qaror loyihasida tegishli sertifikatga ega bo‘lmagan pedagog xodimlar bilan mehnat shartnomasini bekor qilish taklif qilingan edi.

 

Vazirlikning yangi ko‘rsatmasida esa ushbu masala bo‘yicha Vazirlar Mahkamasining qarori qabul qilingach, qo‘shimcha ma’lumot berilishi qayd etilgan.

 

Xorijiy til o‘qituvchilari uchun kamida B2 darajadagi milliy yoki unga tenglashtirilgan xalqaro sertifikatga ega bo‘lish talabi avvalgi hukumat qarorlari bilan belgilangan. Amaldagi sertifikatlar ro‘yxati ham xorijiy til bo‘yicha ishga qabul qilish va pedagoglarga ustama belgilashda qo‘llanadi.

 

B2 sertifikati talabi bo‘yicha muddat avval ham bir necha bor uzaytirilgan. Shu sababli tegishli sertifikatga ega bo‘lmagan o‘qituvchilarga ishlashni davom ettirish imkoniyati berilgan edi.

 

Shunday qilib, hozircha B2 sertifikati mavjud emasligi xorijiy til o‘qituvchisini ishdan bo‘shatish uchun asos bo‘lmaydi. Mazkur masala bo‘yicha yakuniy tartib Vazirlar Mahkamasi qaroridan keyin belgilanadi.