B2 sertifikatiga ega bo‘lmagan xorijiy til o‘qituvchilari ishdan bo'shatilishi mumkin
Tegishli sertifikatga ega bo‘lmagan xorijiy til o‘qituvchilari bilan mehnat shartnomasini bekor qilishni nazarda tutuvchi qaror loyihasi jamoatchilik muhokamasiga qo‘yildi.
O‘zbekistonda B2 darajadagi milliy yoki xalqaro sertifikatga ega bo‘lmagan xorijiy til o‘qituvchilari bilan tuzilgan mehnat shartnomasini bekor qilishni nazarda tutuvchi qaror loyihasi jamoatchilik muhokamasiga qo‘yildi.
Loyihaga ko‘ra, Vazirlar Mahkamasining 2021-yil 19-maydagi 312-son qarorining 9-bandiga qo‘shimcha norma kiritilishi rejalashtirilgan. Unga asosan, umumiy o‘rta, o‘rta maxsus hamda professional ta’lim muassasalarida faoliyat yuritayotgan, belgilangan malaka talabiga mos sertifikatga ega bo‘lmagan xorijiy til o‘qituvchilari bilan mehnat shartnomasi mehnat qonunchiligida belgilangan tartibda bekor qilinishi mumkin.
Qayd etilishicha, amaldagi qarorda xorijiy til o‘qituvchilari uchun B2 darajadagi sertifikat talabi mavjud bo‘lsa-da, mazkur talabni bajarmagan xodim bilan mehnat shartnomasini bekor qilish yoki uni ishdan chetlashtirish bo‘yicha aniq huquqiy asos nazarda tutilmagan.
Maktabgacha va maktab ta’limi vazirligi ushbu huquqiy bo‘shliqni bartaraf etish maqsadida tegishli o‘zgartirishlarni taklif qilmoqda. Avvalroq, 2026-yil 13-yanvarda vazirlik tomonidan umumiy o‘rta ta’lim maktablari xodimlarining malaka tavsiflariga o‘zgartirish va qo‘shimchalar kiritish to‘g‘risidagi buyruq ham qabul qilingan.
Mazkur hujjat loyihasi 12-avgustga qadar jamoatchilik muhokamasida bo‘ladi.
