Kaspiydagi fojia: Toqayev uch nafar yuqori lavozimli harbiy ishdan bo'shatdi
Ular orasida Qozog‘iston harbiy-dengiz kuchlari bosh qo‘mondoni ham bor.
Qozog‘iston prezidenti Qosim-Jomart Toqayev mamlakat Qurolli Kuchlarining uch nafar yuqori lavozimli harbiy xizmatchisini lavozimidan ozod qildi. Ular orasida Harbiy-dengiz kuchlari bosh qo‘mondoni Kanat Niyazbekov ham bor. Bu haqda Qozog‘iston prezidenti matbuot xizmati xabar berdi.
Shuningdek, Kanish Abubakirov mudofaa vazirining birinchi o‘rinbosari va Qurolli Kuchlar Bosh shtabi boshlig‘i, Almaz Jumakeyev esa mudofaa vaziri o‘rinbosari lavozimlaridan ozod etilgan.
Mazkur o‘zgarishlar 24-sentabr kuni Mang‘istov viloyatida Kaspiy dengizida o‘tkazilgan jangovar tayyorgarlik mashg‘ulotlari vaqtida yuz bergan fojiali hodisadan keyin amalga oshirilgan.
Mashg‘ulotlar vaqtida ob-havo keskin yomonlashib, 17 nafar harbiy xizmatchi dengizga olib ketilgan. Ulardan uch nafari qutqarilgan, 14 nafari halok bo‘lgan.
Avvalroq, Qozog‘iston prezidenti Mudofaa vazirligidagi vaziyatni kompleks o‘rganish uchun komissiya tuzgan edi.
