Andijonda og‘ir YTH: uch kishi halok bo‘ldi
Yuk mashinasining tormoz tizimida nosozlik yuzaga kelib, yettita avtomobil bilan to‘qnashgan.
2026-yil 10-oktyabr kuni soat 09:40 larda Buloqboshi tumani «Neftchilar» MFY, Konchilar ko‘chasida og‘ir yo‘l-transport hodisasi sodir bo‘ldi.
Andijon viloyati IIB JXX YHXB axborot xizmatining ma’lum qilishicha, dastlabki ma’lumotlarga ko‘ra, «Neftchilar — Kulla» yo‘nalishida harakatlangan, 1978-yilda tug‘ilgan haydovchi boshqaruvidagi tuproq ortilgan HOWO yuk mashinasining tormoz tizimida nosozlik yuzaga kelgan. Natijada haydovchi boshqaruvni yo‘qotgan.
Yuk mashinasi qarama-qarshi yo‘nalishda harakatlanayotgan Cobalt, Nexia, BYD Song Plus va Nexia-2 avtomobillari, shuningdek, yo‘lning o‘ng tomonida to‘xtab turgan Nexia-3, Damas va Matiz bilan to‘qnashgan. Hodisa oqibatida ko‘cha bo‘yidagi do‘konlarga ham zarar yetgan.
YTH natijasida uch kishi voqea joyida halok bo‘lgan. HOWO haydovchisi va yana uch nafar fuqaro turli tan jarohatlari bilan tuman shifoxonasiga yotqizilgan.
Mazkur holat yuzasidan Buloqboshi tumani IIB huzuridagi Tergov bo‘limi tomonidan Jinoyat kodeksining 266-moddasi 3-qismi bilan jinoyat ishi qo‘zg‘atilgan. Hozirda hodisaning barcha holatlarini aniqlash bo‘yicha dastlabki tergov harakatlari olib borilmoqda.
