Ar-Riyoddagi xalqaro aeroportga hujum: ikki nafar o‘zbekistonlik jarohatlandi
Hodisa vaqtida aeroportda yana 20 nafarga yaqin o‘zbekistonlik bo‘lgan.
10-oktyabr kuni Ar-Riyod shahridagi Podshoh Xolid xalqaro aeroportining 3-terminaliga ballistik raketa orqali hujum uyushtirilgan. Oqibatda 1977 va 1997-yillarda tug‘ilgan ikki nafar O‘zbekiston fuqarosi yengil jarohat olgan. Bu haqda Tashqi ishlar vazirligi matbuot kotibi Omonulla Fayziyev Zamon.uz'ga xabar qildi.
Ularga dastlabki tibbiy yordam ko‘rsatilib, "Diriyah Hospital" shifoxonasiga olib borilgan. Tibbiy ko‘rik va zarur muolajalardan so‘ng har ikki fuqaro shifoxonadan javob berilgan.
Vazirlikning dastlabki ma’lumotlariga ko‘ra, hodisa vaqtida aeroport hududida bo‘lgan yana 20 nafarga yaqin O‘zbekiston fuqarosi jabrlanmagan.
Bildirilishicha, O‘zbekistonning Ar-Riyoddagi elchixonasi Saudiya Arabistonining tegishli idoralari bilan hamkorlikda vaziyatni kuzatib bormoqda. Shuningdek, fuqarolar bilan doimiy aloqada bo‘lib, ularga zarur konsullik yordami ko‘rsatilmoqda.
