“Hech bir bola, hech bir oila o‘z dardi bilan yolg‘iz qolmasligi uchun, farovon kelajagi uchun birlashaylik!" — Ziroat Mirziyoyeva

Samarqandda «Bolalar farovonligiga investitsiya: Kelajak avlodlar barqaror va adolatli taraqqiyoti sari yo‘l» Jahon sammiti doirasida «Sog‘ayishdan farovonlik sari» mavzusida Bolalar onkologiyasi bo‘yicha II xalqaro kongress bo‘lib o‘tmoqda.

 

Tadbirda O‘zbekiston, Ozarbayjon, Qozog‘iston, Qirg‘iziston, Tojikiston va Rossiyaning sog‘liqni saqlash sohasi rahbarlari, Jahon sog‘liqni saqlash tashkiloti, Xalqaro bolalar onkologlari jamiyati, Yevropa onkologiya maktabi vakillari ishtirok etmoqda. Shuningdek, kongress xorijiy universitet klinikalari, yetakchi tibbiyot markazlari, xalqaro va milliy ilmiy hamjamiyat hamda fuqarolik jamiyati vakillarini birlashtirdi.

 

Kongressda so‘zga chiqqan Ziroat Mirziyoyeva dunyo hamjamiyati, hukumatlar, olimlar va insonparvar tashkilotlarni bolalar salomatligi yo‘lida aniq va kechiktirib bo‘lmaydigan choralar ko‘rish uchun birlashishga chaqirdi.

 

«Dard va kasallik siyosiy chegara, millat yoki daromad tanlamaydi. Hech bir bola, hech bir oila o‘z dardi bilan yolg‘iz qolmasligi uchun, farovon kelajagi uchun birlashaylik!» — dedi u.

 

Kongress doirasida «Mehrli Maktab» o‘quvchilarining chiqishi ham ishtirokchilarda katta taassurot qoldirdi. Bolalar o‘z hayotiy hikoyalari orqali nafaqat shaxsiy kechinmalarini, balki dunyo bolalarining umid va orzularini ham ifoda etdi.

 

Ularning chiqishi kongress qatnashchilariga davolanish jarayoni va uning natijalariga kichik bemorlar nigohi bilan qarash, bolalarning matonati hamda minnatdorligini his etish imkonini berdi.