Prezident Shavkat Mirziyoyev til bayrami bilan O‘zbekiston xalqini tabrikladi

O‘zbekiston Prezidenti Shavkat Mirziyoyev 21-oktyabr — O‘zbek tili bayrami kuni munosabati bilan vatandoshlarni tabriklab, davlat tilini rivojlantirish, ta’lim sifatini oshirish va o‘zbek tilining zamonaviy texnologiyalardagi imkoniyatlarini kengaytirish bo‘yicha muhim vazifalarni qayd etdi.

 

Davlat rahbari ona tili xalqning tarixiy xotirasi, bilimi, tajribasi va ma’naviy qadriyatlarini o‘zida mujassam etishini ta’kidladi. Uning so‘zlariga ko‘ra, o‘zbek tilining imkoniyatlarini yangi ilmiy yutuqlar, texnologiyalar va ijod namunalari bilan boyitish muhim vazifalardan biridir.

 

Prezident O‘zbekistonda turli millat va elat vakillari yagona oila bo‘lib yashashini ta’kidlab, har bir insonning ona tili va madaniy qadriyatlariga hurmat ko‘rsatish do‘stlik va hamjihatlikning muhim asosi ekanini qayd etdi. Shu bois qoraqalpoq tili va boshqa tillarni rivojlantirish, o‘zbek tilini o‘rganish uchun qulay sharoitlar yaratish ishlari o‘zaro uyg‘un ravishda olib borilayotgani bildirildi.

 

Shavkat Mirziyoyev ta’lim sohasida o‘quvchilarning o‘qish, tushunish, gapirish va savodli yozish ko‘nikmalarini rivojlantirishga ustuvor ahamiyat berish zarurligini ta’kidladi. Darsliklar va o‘qitish usullarini yangilashda o‘zbek tilini ona tili sifatida o‘rganayotgan bolalar bilan uni davlat tili sifatida o‘zlashtirayotgan o‘quvchilarning ehtiyojlari o‘rtasidagi farqni hisobga olish lozimligi qayd etildi.

 

Davlat idoralari faoliyatida ham davlat tiliga hurmat namoyon bo‘lishi kerak. Qonunlar, qarorlar, yo‘riqnomalar va fuqarolarning murojaatlariga beriladigan javoblar ravon, aniq va tushunarli tilda yozilishi zarurligi ta’kidlandi.

 

Shuningdek, tibbiyot, muhandislik, iqtisodiyot va boshqa sohalarda o‘zbek tilidagi ishonchli ilmiy adabiyotlar, sifatli tarjimalar hamda elektron resurslardan foydalanish imkoniyatlarini kengaytirish muhimligi qayd etildi. Bu borada olimlar, tilshunoslar, tarjimonlar va soha mutaxassislarining hamkorligi zarurligi bildirildi.

 

Prezident o‘zbek tilining raqamli muhitdagi imkoniyatlarini kengaytirish masalasiga ham alohida to‘xtaldi. Xususan, elektron lug‘atlar, tarjima va tahrir vositalari, nutqni matnga hamda matnni ovozga aylantiradigan texnologiyalarni rivojlantirish muhim vazifalar sifatida belgilandi. Bunda mualliflik huquqi va shaxsiy ma’lumotlarni himoya qilish, shuningdek, nogironligi bo‘lgan insonlar uchun ham qulay imkoniyatlar yaratishga e’tibor qaratish lozimligi ta’kidlandi.

 

Davlat rahbari sun’iy intellekt vositalarining davlat tilidagi sifatini insonlarga qanchalik aniq va foydali yordam bera olishi bilan baholash kerakligini qayd etdi. Yozuv va imlo masalalaridagi yechimlar esa ilmiy asos, jamoatchilik bilan muloqot va amaliy tayyorgarlikka tayanishi zarurligini bildirdi.

 

Shavkat Mirziyoyev o‘zbek tilini rivojlantirish yo‘lida mehnat qilayotgan olimlar, tadqiqotchilar, muallimlar, tarjimonlar, adiblar, jurnalistlar, noshirlar va axborot texnologiyalari mutaxassislariga minnatdorlik bildirdi. Shuningdek, o‘zbek tilini o‘rganayotgan yurtdoshlar va xorijliklarga tashakkur aytib, ona tilining nufuzini oshirish hamda uning dunyo bilan muloqotini kengaytirishga hissa qo‘shishga chaqirdi.

 

Prezident tabrik yakunida vatandoshlarga sihat-salomatlik, tinchlik, farovonlik va muvaffaqiyatlar tiladi.