Afg‘oniston hukumati kuchlari Toliqon shahri yaqinidagi ikki tumanni “Tolibon”dan qaytarib oldi.
TOLOnews nashrining xabar berishicha, Vasaj va Farxor tumanlari jangarilardan ozod qilingan. Buni Afg‘oniston Ichki ishlar vazirligi ham tasdiqladi.
Yana ikki viloyatda “Tolibon” hujumlari avj oldi
“Tolibon” Samangan va Balx viloyatlariga hujumni davom ettirmoqda. Samangan viloyatida Afg‘oniston parlamenti sobiq aʼzosi Muhammad Asif Azimiy boshchiligidagi 150 askar “Tolibon”lar tarafiga o‘tib ketdi. “Tolibon” hozirda viloyat markazi bo‘lgan Oyboq shahridan uch kilometr uzoqlikda turibdi. Harakat rasmiy vakili Zabihullo Mujohid Oyboq shahri to‘liq egallanganini maʼlum qildi.
Balx viloyatidagi Hazrati-Sulton tumani jangarilar tomonidan bosib olindi. Afg‘oniston Mudofaa vazirligi rasmiy vakili Favod Omonning maʼlum qilishicha, hukumat qo‘shinlarining maxsus qismlari Balx markazi Mozori Sharif shahriga qilingan hujumlarni qaytarishga muvaffaq bo‘lgan. Balx viloyati O‘zbekiston chegaralariga yaqin joylashgan.
Do‘stum tobora faollashmoqda
So‘nggi kunlarda marshal Abdulrashid Do‘stumning Afg‘oniston harbiy-siyosiy hayotida faollashuvini kuzatish mumkin. 8 avgust kuni Do‘stum mudofaa vaziri Bismilloxon Muhammadiy bilan uchrashgani xabar qilingan edi. 9 avgust kuni marshal Faryob viloyati rasmiylari bilan telefonda muloqot qildi. Do‘stum viloyatga qurol-yarog‘ yetkazishni ko‘paytirishni aytgan.
Zamir Kobulov: Afg‘onistonda muvozanat o‘rnatiladi
RF Prezidentining Afg‘oniston masalasi bo‘yicha maxsus vakili Zamir Kabulov “Tolibon” ko‘p hududlarni egallayotganiga qaramay, tez orada mamlakat hududida muvozanat o‘rnatilishi mumkinligini bildirdi. Uning so‘zlariga ko‘ra, 11avgustda Dohada Rossiya, AQSH, Pokiston va Xitoy vakillari ishtirokida bo‘lib o‘tadigan uchrashuvda “Tolibon” olib borayotgan harakatlar muhokama qilinadi.
Afg‘onistonda vaziyat AQSH va NATO qo‘shinlari olib chiqilishi ortidan keskinlashdi. Hukumat va “Tolibon”lar o‘rtasida to‘qnashuvlar tobora avj olmoqda.
Jahongir Qo‘ziyev