Аҳмад Масъуд  Ғарб давлатларидан ёрдам сўради

 

Масъуднинг шу мазмундаги мактуби “The Washington Post”да чоп этилган.

 

Унда айтилишича, АҚШ ва унинг иттифоқчилари жанг майдонини тарк этишди. Лекин АҚШ ҳали ҳам демократия таянчи бўлиши ва Афғонистон халқига ёрдам бериши мумкин.  “Шу мақсадда мен Афғонистоннинг Ғарбдаги дўстларини, Вашингтон ва Ню Ёркни, АҚШ Конгресси ва Байден маъмуриятини, мен таълим олган Лондон ҳамда отам (Аҳмадшоҳ Масъуд) номи билан аталадиган хиёбон мавжуд Парижни бизни қўллаб-қувватлашга чақираман”,- деган Масъуд.

 

Шунингдек, қўмондон у ва собиқ вице-президент Амрулла Солиҳ сафига афғон армиясининг руҳи тушган аскарлари, жумладан, махсус қисм ҳарбийлари қўшилаётганини маълум қилган. Масъуд  “Нима бўлишидан қатъи назар мен ва аскарларим Афғонистондаги озодликнинг сўнгги таянчи Панжшерни ҳимоя қиламиз. Бизнинг иродамиз синмайди. Тажрибамиздан бизни нима кутаётганини биламиз. Бизга кўп миқдорда қурол-яроғ керак”,- деб таъкидлаган.

 

Толиблар ҳужум бошлаган тақдирда Панжшерда қаттиқ қаршиликка дуч келиши қайд этилган. “Лекин Ғарб бизни  қурол билан таъминламаса,  шахсий ресурсларимиз тезда тугайди”, деб айтган Масъуд.

 

Бундан аввал АҚШ собиқ президенти Доналд Трамп АҚШ ҳарбийлари Афғонистонда хавф остида эканилигини айтган эди.

 

 Жаҳонгир Қўзиев