Andijon viloyatining Paxtaobod tumanida qarzdor ota farzandi taʼminoti uchun 204 mln so‘m miqdorida aliment to‘ladi. Bu haqida MIB axborot xizmati xabar berdi.
Fuqarolik ishlari bo‘yicha Chirchiq tumanlararo sudining ijro hujjatiga asosan qarzdor X.X.dan undiruvchi X.I.ning foydasiga bir nafar farzandining taʼminoti uchun 1/4 qism miqdorida aliment undirilishi belgilangan.
Majburiy ijro byurosi Paxtaobod tuman bo‘limi tomonidan ijroni taʼminlash maqsadida qarzdor X.X.ning O‘zbekiston hududidan chetga chiqish huquqlari tegishli qonun talablariga ko‘ra cheklab qo‘yilgan.
Qarzdor aliment to‘lovlarini o‘z vaqtida amalga oshirmaganligi sababli 56 mln so‘m aliment qarzi yig‘ilib qolgan. Ijro harakatlari davomida olib borilgan profilaktik suhbat jarayonida qarzdor X.X. aliment qarzlari bilan birga 5 yillik aliment pullarini oldindan to‘lab berishini maʼlum qildi.
Xorijga chiqish istagida yurgan qarzdor ota farzandi taʼminoti uchun jami 204 mln so‘m aliment pulini undiruvchiga taqdim etdi.