AQSH Xitoy yetakchisi Si Szinpinning Moskvaga tashrifi chog‘ida Ukrainada o‘t ochishni to‘xtatishga yordam berishini kutmoqda. Bu haqda Qo‘shma Shtatlar Davlat kotibi Entoni Blinken maʼlum qildi.
Bugun, 20 mart kuni Xitoy raisi davlat tashrifi bilan Moskvaga borgan.
“Biz Xitoydan ushbu tashrifdan foydalanib, Ukrainada o‘t ochishni to‘xtatish chaqirig‘ini takrorlashini kutamiz”, — dedi Blinken jurnalistlarga.
Uning taʼkidlashicha, har qanday tinch yo‘l bilan kelishuv Ukraina suverenitetini tasdiqlashi kerak.
Fevral oyida Xitoy Tashqi ishlar vazirligining 12 banddan iborat bayonoti Ukraina inqirozini siyosiy yo‘l bilan hal qilish bo‘yicha pozitsiyasi bilan eʼlon qilingandi. Asosiy fikrlar orasida barcha mamlakatlarning suvereniteti va hududiy yaxlitligini hurmat qilish zarurati, Moskva va Kiyev o‘rtasida to‘g‘ridan-to‘g‘ri muloqotni qayta tiklash, yana-da keskinlashuvning oldini olishga chaqirish bor.
