Асқар Акаев Канаданинг “Centerra” компанияси билан “Қумтор” бўйича тузилган шартнома “катта хато” бўлганини тан олди
Асқар Акаев “Қумтор” олтин кони бўйича шартнома тузилишида айбини тан олди ва Қирғизистон халқидан кечирим сўради.
Аввалроқ Қирғизистоннинг биринчи президенти Асқар Акаев “Қумтор” олтин кони билан боғлиқ жиноий иш доирасида Бишкекка келтирилгани ҳақида хабар қилган эдик.
Собиқ президентнинг сўзларига кўра, у шартнома тузилган вақтда давлат раҳбари бўлгани учун йўл қўйилган хатолар учун жавобгардир. Шунингдек, Акаев шартнома имзоланаётган пайтда уни адаштиришганини таъкидлаган. У 2003 йилги “Centerra” компанияси билан тузилган шартномани “катта хато” эканини айтиб ўтган.
Асқар Аакаев шу билан тергов жараёнларидаги иштирокини якунлаб Москвага жўнаб кетди. Маҳаллий ОАВ маълумотларига кўра, у “Аэрофлот” авиакомпаниясининг самолётида учиб кетган. Баъзи маълумотларга кўра у билан бирга ўғли Илим ҳам бўлган.
Эслатиб ўтамиз Асқар Акаев “Қумтор” олтин кони бўйича жиноят иши доирасида 2 август куни Москвадан Қирғизистонга олиб келинган эди.
