OpenAI kompaniyasi sunʼiy intellektga asoslangan ChatGPT xizmatidan ro‘yxatdan o‘tmasdan foydalanish imkoniyatini taqdim qildi. Avval undan mobil telefon raqami orqali ro‘yxatdan o‘tgan holda foydalanish mumkin edi.
Kompaniya «Sunʼiy intellekt imkoniyatlariga qiziqqan har bir kishi uchun» buni bosqichma-bosqich joriy etishini maʼlum qildi.
"185 mamlakatda 100 milliondan ortiq kishi har hafta ChatGPT xizmatidan yangi narsalarni o‘rganish, ijodiy ilhom topish va o‘z savollariga javob olish uchun foydalanadi. Bugundan boshlab ChatGPT xizmatidan ro‘yxatdan o‘tmasdan foydalanishingiz mumkin", — deyiladi kompaniya xabarida.
Shu bilan birga, taʼkidlanishicha, ChatGPT xizmatidan ro‘yxatdan o‘tgan holda foydalanish ko‘plab afzalliklarni, jumladan chat tarixini saqlash va ko‘rish, chatlarni almashish va ovozli suhbatlar va maxsus ko‘rsatmalar kabi qo‘shimcha funksiyalardan foydalanish imkonini beradi.
ChatGPT bepul versiyadan tashqari, jismoniy shaxslar, guruhlar va kompaniyalar uchun pullik versiyalarni ham taklif qiladi. Kompaniya, shuningdek, o‘z modellarini yaxshilash uchun foydalanuvchilar tomonidan taqdim etilgan kontentdan foydalanishi mumkinligini maʼlum qilgan. Biroq foydalanuvchilar bu xususiyatni o‘chirib qo‘yishi mumkin.