6-avgust kuni Gana qurolli kuchlariga tegishli Z-9 rusumli harbiy vertolyotning qulashi oqibatida mamlakat Mudofaa vaziri doktor Edvard Kofi Omane Boama va Atrof-muhit, fan va texnologiya vaziri Ibrohim Murtala Muhammad fojiali tarzda halok bo‘ldi.
Rasmiy ma’lumotlarga ko‘ra, vertolyot poytaxt Accradan Ashanti viloyatining Obuasi shahriga parvoz qilayotgan bo‘lgan. Uchishdan ko‘p o‘tmay, radar bilan aloqa uzilgan. Qidiruv ishlari davomida halokatga uchragan vertolyot joyi aniqlangan.
Ushbu halokatda jami 8 kishi — besh nafar yo‘lovchi va uch nafar ekipaj a’zosi — halok bo‘lgan. Ular orasida prezidentlik maslahatchilari, siyosiy partiya rahbarlari ham borligi aytilmoqda.
Prezident idorasi fojia yuzasidan bayonot berib, marhumlarning oila a’zolariga chuqur hamdardlik bildirdi. Davlat miqyosida motam e’lon qilindi, tergov ishlari boshlangan.