O‘zbekiston Ichki ishlar vazirligi xabariga ko‘ra, og‘ir jinoyatlarda ayblanib, xalqaro qidiruvda bo‘lgan ikki nafar fuqaro Birlashgan Arab Amirliklarida qo‘lga olinib, mamlakatga topshirildi. Jarayon Toshkent va Abu-Dabi Interpol milliy markaziy byurolari hamkorligida amalga oshirilgan.
Rasmiy ma’lumotlarga ko‘ra, mazkur shaxslar O‘zbekiston hududida sodir etilgan iqtisodiy va mulkiy jinoyatlar bo‘yicha qidiruvda bo‘lgan. Ular endilikda tergov va sud jarayonida o‘z qilmishlari uchun javob berishi kerak bo‘ladi.
Mutasaddilarning ta’kidlashicha, xalqaro hamkorlik jinoyatchilikka qarshi kurashda muhim ahamiyat kasb etmoqda. Aynan shunday hamkorlik natijasida, chet elda yashirinib yurgan qidiruvdagi shaxslar yurtga qaytarilmoqda.
Eslatib o‘tamiz, bundan avval ham Turkiyada o‘tkazilgan tezkor tadbirlar davomida firibgarlikda gumonlangan bir nechta shaxs qo‘lga olinib, O‘zbekistonga deportatsiya qilingan edi.