Boks, og‘ir atletika, baydarka va kanoeda eshkak eshish bo‘yicha jahon chempionatlarida yuqori natija qayd etgan 13 nafar sportchi va ularning murabbiylariga prezident sovg‘asi topshirildi, deb xabar bermoqda Milliy olimpiya qo‘mitasi matbuot xizmati.
Musobaqalarda oltin medal olganlarga 15 000 dollar, kumush medal egalariga 7 500 dollar, bronza medal uchun 3 750 dollar mukofot berildi. Murabbiylar esa sportchilar olgan mablag‘ning yarmini miqdorida bir martalik pul mukofotiga sazovor bo‘ldilar.
Shuningdek, oltin medal sovrindorlari BYD Song Plus Champion, kumush va bronza egalari esa BYD Chazor avtomobillari kalitlariga ega bo‘ldi.
Eslatib o‘tamiz, Ruslan Nurudinov Bahrayndagi og‘ir atletika bo‘yicha jahon chempionatida jahon rekordini yangilab, uch karra jahon chempioni bo‘lgandi. Milandagi baydarka va kanoeda eshkak eshish bo‘yicha JCHda esa Artur Guliyev oltin medal qo‘lga kiritgandi.