O‘zbekiston Respublikasi huquqni muhofaza qiluvchi organlari tomonidan o‘tkazilgan tezkor tadbir davomida Jizzax viloyati Favqulodda vaziyatlar boshqarmasining bir guruh xodimlari noqonuniy harakat ustida qo‘lga olindi.
Aniqlanishicha, A.J.X., 1-darajali serjant J.B.N. va kichik serjant Y.Sh.A. fuqaro X.B.ni yuqori lavozimdagi tanishlari orqali viloyat FVB tizimiga ishga joylashtirishga va’da bergan. Ular buning evaziga 1500 AQSh dollari talab qilib, 1100 AQSh dollari hamda 750 ming so‘mni olayotgan vaqtida qo‘lga tushgan.
Mazkur holat yuzasidan xodimlarga nisbatan O‘zbekiston Respublikasi Jinoyat kodeksining 168-moddasi (firibgarlik) va 211-moddasi (pora olish) bo‘yicha jinoyat ishi qo‘zg‘atildi. Hozirda dastlabki tergov harakatlari olib borilmoqda.