“Biz tez yordam xalqqa foydamiz tegsin, odamlar shifo topsin, deb harakat qilyapmiz. Lekin tepadagi Sog‘liqni saqlash vazirligidagilar, avtomobil bo‘yicha mas’ullar bizni ham tushunsa bo‘lardi. Bemorlar uchun dori-darmonlarimiz yetarli, lekin mashina tomondan juda qiynalyapmiz.
Kecha bir bemor mashinada klinik o‘lim holatiga tushdi. Lekin yo‘llar tirband, avtomobilning na migalkasi bor, na signalizasiyasi ishlaydi. Hatto signal ham ishlamaydi, rasiya yo‘q. Hech kim yo‘l bermaydi! Endi boshimizni derazadan chiqarib “yo‘l bering” deb baqirib keta olmaymiz-ku?!
Mashinaning orqasiga kimnidir o‘tqizadigan bo‘lsak, eshigi qulflanmaydi. Bemorning o‘zi ham tushib qolishi mumkin. Kim o‘z yaqinini shu mashinaga ortishni xohlaydi?!” – deyiladi murojaatda.
Ikkinchi shifokor ham shu “Damas”da bemor klinik o‘lim holatiga tushgani va qiyin ahvolda qolgani haqida gapirdi.
Sog‘liqni saqlash vazirining matbuot kotibi Furqat Sanayev yuqoridagi holatga rasmiy izoh bildirdi.
“Shifokorlarimizning e’tirozlari o‘rinli, shu sababli ushbu murojaat ijtimoiy tarmoqlarda tarqalgan kunning o‘zidayoq, Sog‘liqni saqlash vazirligi mazkur holatni darhol nazoratga oldi.
Aniqlanishicha, chindan ham Yangiyo‘l tuman tez tibbiy yordam bo‘limining davlat raqami 10 236 DAA bo‘lgan “Damas” rusumli tez tibbiy yordam avtomashinasi eskirib, yaroqsiz holga kelgan. Xususan, o‘rganish davomida avtotransport vositasining orqa eshigi yaxshi yopilmasligi, ovoz chiqaruvchi (sirena-signal) moslamasi hamda ogohlantiruvchi chiroq (migalka)lari ishlamasligi ma’lum bo‘ldi. Shu sababli texnik nosoz tez tibbiy yordam avtomashinasi zaxiraga olinib, texnik soz holatdagi avtomashina bilan almashtirildi.
Shuningdek, Toshkent viloyat Sog‘liqni saqlash boshqarmasining ixtisoslashtirilgan avtobazasiga qarashli Yangiyo‘l tuman filiali bo‘limi mexanigi R.N. o‘z ishiga sovuqqonlik bilan qaragani uchun lavozimidan ozod etildi”, – deydi F.Sanayev.
Ma’lumot uchun, o‘tgan 2020-yilda Toshkent shahar “Tez yordam” stansiyasiga 150 dona “Ford” rusumli reanimasion tibbiy apparatlar bilan jihozlangan avtomashinalar xarid qilingan.
Avvalroq SSV tasarrufida maxsus "Call-markaz" ishga tushirilgani haqida xabar bergandik.
Maftuna Rejabboyeva tayyorladi
