O‘zbekistonda musiqa madaniyati va jismoniy tarbiya yo‘nalishidagi o‘qituvchilarning kasbiy mahoratini e’tirof etish tizimi kengaymoqda. Hukumat qaroriga muvofiq, ushbu fanlar bo‘yicha B+ va undan yuqori darajadagi sertifikat olgan pedagoglarga oylik ish haqiga qo‘shimcha ustama to‘lanadi.
Mazkur tartib Bilim va malaka baholash agentligi tomonidan amalga oshiriladi. Sertifikatlar amaliy hamda test sinovlari asosida uch yil muddatga elektron shaklda beriladi. Baholash mezonlariga ko‘ra, A+ — 70 ball va undan yuqori, A — 65–69,9, B+ — 60–64,9, B — 55–59,9, C+ — 50–54,9, C — 46–49,9 ball to‘plagan o‘qituvchilar sertifikat egasiga aylanadi.
Rasmiylar ta’kidlaganidek, ushbu tizim o‘qituvchilarni o‘z ustida muntazam ishlashga undaydi, ta’lim sifati va o‘quvchilarning ijodiy hamda jismoniy rivojlanishiga ijobiy ta’sir ko‘rsatadi.