O‘zbekistonda ko‘chma lazer nurlantiruvchilaridan noqonuniy foydalanganlik uchun javobgarlik choralarini belgilovchi qonun Oliy Majlis Senati tomonidan maʼqullandi. Bu haqda parlament yuqori palatasi matbuot xizmati xabar berdi.
Qayd etilishicha, texnologiyalarning jadal rivojlanishi natijasida portativ lazer nurlantiruvchilari keng ommalashib bormoqda. Ushbu qurilmalar arzonligi va oson topilishi sababli ko‘pincha o‘yin-kulgi yoki taʼlim maqsadlarida qo‘llanilmoqda. Shu bilan birga, ulardan noqonuniy yoki noto‘g‘ri foydalanish jamoat xavfsizligiga jiddiy tahdid solishi mumkin.
Senat majlisida uchish yoki qo‘nish jarayonida samolyot ekipajlariga lazer nurlarini yo‘naltirish ularning eʼtiborini chalg‘itishi, bu esa aviahalokatlar xavfini oshirishi taʼkidlandi. Shuningdek, huquqni muhofaza qilish organlari xodimlariga lazer nurlari yo‘naltirilishi vaqtinchalik ko‘rish qobiliyatining pasayishiga olib kelib, jamoat tartibini taʼminlash jarayoniga salbiy taʼsir ko‘rsatishi mumkinligi qayd etildi.
Taʼkidlanishicha, ko‘plab xorijiy davlatlarda lazer qurilmalaridan foydalanish qatʼiy tartibga solingan. O‘zbekistonda ham mazkur qonun ko‘chma lazer nurlantiruvchilaridan noqonuniy foydalanishni nazorat qilish, litsenziyalash hamda javobgarlik choralarini belgilash orqali jamoat xavfsizligini mustahkamlashga qaratilgan.
Qonun bilan amaldagi qonunchilikka bir qator o‘zgartish va qo‘shimchalar kiritilmoqda. Xususan, mahalliy huquqni muhofaza qilish organlari hamda nazorat-o‘tkazish punktlarining tarkibi, u yerda xizmat qilayotgan inspektorlarning vakolatlari aniqlashtirilmoqda. Shuningdek, patrul-post xizmati mansabdor shaxslari tomonidan tuzilgan maʼmuriy bayonnomalarni ko‘rib chiqish va jazo choralarini qo‘llash vakolatiga ega shaxslar belgilanmoqda hamda ko‘chma lazer nurlantiruvchilaridan noqonuniy foydalanganlik uchun javobgarlik mustahkamlanmoqda.