O‘zgidromet agentligining xabarida ko'ra, 5-yanvar kuni Ugam–Chatqol tog‘ tizmasining borish qiyin bo‘lgan hududida joylashgan “Oygaing” yuqori tog‘li meteorologik kuzatuv stansiyasida xizmat olib borayotgan xodimning ahvoli keskin yomonlashgan. Bu haqda O‘zgidromet rahbariyati Mudofaa vazirligiga murojaat qilib, uni zudlik bilan evakuatsiya qilish zarurligini ma’lum qilgan. Bu haqda Mudofaa vazirligi xabar berdi.
Shundan so‘ng Mudofaa vazirligi Harbiy-havo kuchlarining navbatchi qidiruv-qutqaruv ekipaji jalb etilgan. Murakkab relef va qorong‘u vaqtga qaramay, vertolyot yordamida tungi qutqaruv amaliyoti muvaffaqiyatli amalga oshirilgan va xodim tezkorlik bilan Chirchiq shahridagi tibbiyot muassasasiga yetkazilgan.
Ma’lum qilinishicha, evakuatsiya qilingan shaxs — O‘zgidromet agentligining Oygaing qor ko‘chki stansiyasi boshlig‘i R. Ibragimov bo‘lib, unga Chirchiq shahridagi tez tibbiy yordam markazida o‘z vaqtida birinchi tibbiy yordam ko‘rsatilgan.
Ayni paytda xodimning ahvoli barqaror, u malakali shifokorlar nazoratida ekani aytimoqda. O‘zgidromet tomonidan barcha zarur dori-darmonlar va davolanish xarajatlari bilan ta’minlanayotgani bildirildi.