Пекин Европа мустақиллигини қўллаб-қувватлайди — Ван И
Хитой ташқи ишлар вазири франциялик ҳамкасби билан телефон орқали мулоқот қилди.
Хитой Европадаги интеграцион жараёнларни ҳамда Евроиттифоқнинг стратегик мустақиллигини қўллаб-қувватлайди. Бу ҳақда Хитой ташқи ишлар вазири Ван И маълум қилди.
Дипломат бу ҳақда франциялик ҳамкасби Катрин Колонна билан телефон мулоқоти чоғида айтган.
"Хитой Европадаги интеграцион жараёнларни қатъий қўллаб-қувватлайди. Биз Франциянинг ЕИ стратегик мустақиллигини таъминлаш мақсадида амалга ошираётган ишларини ёқлаймиз", — деган у.
Шунингдек, Пекин Евроиттифоқ билан фақатгина дўстлик алоқаларини ўрнатгани ҳамда ҳамкорлик "устувор тенденция" бўлиши лозимлиги таъкидланган.
"Хитой ва ЕИ рақиблар эмас, ҳамкорлардир", — деган Хитой бош дипломати.
Аввалроқ Хитой ва АҚШ вакиллари халқаро майдондаги долзарб масалаларни муҳокама қилганди.
