Mahalla joriy yilda “obod mahalla” dasturi asosida rekonstruksiya qilindi. Hududdagi ko‘p qavatli uylar kapital ta’mirlanib, atrofi yangi ko‘rinishga keltirildi. Mahalla markazining zamonaviy binosi foydalanishga topshirildi.
Prezident avvalo mahalla faollari, nuroniylar va yoshlar bilan ochiq muloqot qildi. Unda past bo‘g‘in muammolarini o‘z vaqtida hal etish, mahallalarning obodligini ta’minlash va aholining farovonligini oshirish bo‘yicha olib borilayotgan islohotlar natijalari Sirdaryoda ham yaqqol ko‘zga tashlanayotgani ta’kidlandi.
Mahalla – jamiyatimizning yuzi. Hayotimizdagi barcha o‘zgarishlar avvalo shu yerda aks etadi. Bugun ko‘p muammolarga yechim aynan mahallaning o‘zida topilmoqda. Bu tizimni yana-da takomillashtiramiz, – dedi Prezident.
Issiqlik ta’minotini yaxshilash maqsadida 18 milliard so‘m mablag‘ hisobidan zamonaviy qozonxona va 3,3 kilometr issiqlik tarmog‘i barpo etildi. Ko‘p qavatli uylarga 23 ta individual issiqlik punktlari o‘rnatildi. Mahalliy budjet hisobidan 800 xonadonga ega 20 ta uy ichki issiqlik tizimlari yangilandi, 1 ta bog‘cha markazlashgan issiqlik va issiq suv bilan ta’minlandi.
Yangi qozonxona qo‘shimcha qulaylik yaratish bilan birga, yiliga 144 ming kilovatt-soat elektr energiyasi hamda 627 ming kub metr gaz tejalishini ta’minlaydi.
Davlat rahbari bu boradagi ishlarni tizimli davom ettirish, qurilish va ekspluatatsiyada zamonaviy texnologiyalarni keng joriy etish, mutaxassislar malakasini oshirish bo‘yicha topshiriqlar berdi.
Uchrashuv davomida “yettilik” vakillari va nuroniylar bilan mahalla hayotidagi o‘zgarishlar yuzasidan suhbat bo‘lib o‘tdi.
Sirdaryo viloyatida infratuzilmani modernizatsiya qilish bo‘yicha qabul qilingan qaror doirasida 215 ta ko‘p qavatli uy qamrab olingan manzilli ro‘yxat shakllantirilgan. Dastur asosida tom va fasadlarni ta’mirlash, issiqlik ta’minotini yaxshilash, muhandislik tarmoqlarini modernizatsiya qilish hamda atrof muhitni obodonlashtirish ishlari bosqichma-bosqich amalga oshiriladi.