Сомалида навбатдаги теракт: халқаро кучлар аскарлари ҳалок бўлди
Сомали жанубидаги портлаш оқибатида 7 нафар халқаро тинчликпарвар кучлар аскарлари ҳалок бўлди. Бу ҳақда “РИА Новости” хабар берди.
25 сентябрь куни жанубдаги Маҳадай шаҳрида портлаш содир бўлган. Портлашнинг асосий нишони Африка Иттифоқи аскарлари колоннаси бўлган. Ушбу терактга “Аш-Шабоб” террорчилик ташкилоти жавобгарликни зиммасига олди.
Террорчилар Бурундининг 7 нафар аскари ҳалок бўлганини маълум қилган. Шунингдек, зирҳли автомобиль йўқ қилинган.
“Аш-Шабоб” Сомали давлатида фаолият юритади. Ушбу гуруҳ “Ал-Қоида” халқаро террористик ташкилоти билан мустаҳкам алоқаларга эга. У Сомали марказий ҳукуматига қарши фаолият олиб боради. Бу ўз навбатида, БМТ гуманитар ёрдам беришига катта қийинчилик туғдирмоқда. АҚШ доимий равишда “Аш-Шабоб” марраларига зарба бериб келади.
Эслатиб ўтамиз, аввалроқ ушбу гуруҳ Сомалидаги аеропортни вайрон қилганди.
