Surxondaryo viloyatida davlat yer uchastkasini noqonuniy sotishga urinish fosh etildi.
Bosh prokuratura matbuot xizmati ma’lum qilishicha, Jarqo‘rg‘on tumanida Kadastr palatasi xodimi hamda mahalliy fuqaro davlat zaxirasidan 40 sotix yer maydonini noqonuniy ravishda sotishga uringan paytda qo‘lga olingan.
Tergov materiallariga ko‘ra, ular yer uchastkasi uchun 200 million so‘m va hujjatlarni tayyorlash uchun qo‘shimcha 4 million so‘m talab qilgan. Pul mablag‘i topshirilayotgan vaqtda huquqni muhofaza qiluvchi organlar xodimlari tomonidan jinoyat harakati to‘xtatildi.
Mazkur holat yuzasidan Jinoyat kodeksining tegishli moddalari bo‘yicha jinoyat ishi qo‘zg‘atilgan. Hozirda tergov harakatlari olib borilmoqda.