Ўзбекистон Афғонистонга гуманитар ёрдам юборди

 

 

Ўзбекистон президентининг Афғонистон бўйича махсус вакили И.Иргашев ва Сурхондарё вилояти ҳокими Т.Боболов Афғонистоннинг Ҳайратон шаҳрида "Толибон" ҳаракати вакиллари билан учрашди.

 

Қайд этилишича, озиқ-овқат маҳсулотлари, дори-дармон ва кийим-кечаклардан иборат бўлган 1,3 минг тонналик инсонпарварлик ёрдами афғон расмийларига топширилган.

 

 

Ўзбекистон ТИВ хабарига кўра, маросимда сўзга чиққан Афғонистон муваққат ҳукумати расмий вакили Забиҳулла Мужоҳид бутун афғон халқи номидан Ўзбекистон президенти Шавкат Мирзиёевга бугунги синовли даврда мамлакатга кўрсатаётган юксак эътибори, қўллаб-қувватлаши ва бирдамлиги учун чуқур миннатдорлик билдирган.

 

Балх вилояти губернатори Қудратилло Абу Ҳамзанинг сўзларига кўра, бу ёрдам аслида Афғонистонга пандемия оқибатларини бартараф этишга, шунингдек, мамлакатда юзага келиши мумкин бўлган гуманитар ва озиқ-овқат инқирозининг олдини олишга хизмат қилади.

 

Гуманитар ёрдам бутун мамлакат бўйлаб муҳтож афғонларга тарқатилиши кўзда тутилган.

 

Эслатиб ўтамиз, Жаҳон соғлиқни сақлаш ташкилоти Кобул аэропортидаги чекловлар туфайли Афғонистонга 500 тоннага яқин тиббий буюмларни етказиб бериш имконияти бўлмаётганини маълум қилганди. 

 

Аввалроқ Афғонистон чуқур гуманитар инқироз ёқасида тургани ҳамда бешта мамлакатдан гуманитар ёрдам олгани ҳақида хабар берилганди.