Toshkent viloyatida Davlat kadastrlari palatasi boshqarmasi Bo‘stonliq tuman filialining xodimi 5 ming AQSh dollari miqdorida pora olayotgan vaqtida qo‘lga olindi. Bu haqda Davlat xavfsizlik xizmati zamon.uzga xabar berdi.
Ma’lum qilinishicha, mansabdor shaxs Bo‘stonliq tumanida joylashgan 8 sotix yer maydonidagi xonadonning kadastr hujjatlarini yuqori lavozimdagi tanishlari orqali rasmiylashtirib berish evaziga 5 ming dollar talab qilgan.
Davlat xavfsizlik xizmati Toshkent viloyati boshqarmasi, Iqtisodiy jinoyatlarga qarshi kurashish departamenti va Ichki ishlar organlari xodimlari hamkorligida o‘tkazilgan tezkor tadbirda xodim so‘ralgan pulni olgan paytda ushlandi. Ashyoviy dalillar huquqni muhofaza qilish organlariga topshirildi.
Hozirda mazkur shaxsga nisbatan O‘zbekiston Respublikasi Jinoyat kodeksining 168-moddasi 2-qismi “a”, “b” bandlari va 28, 211-moddasi 1-qismi bo‘yicha jinoyat ishi qo‘zg‘atilgan va tergov harakatlari olib borilmoqda.