Тошкент вилоятида кадастр ходими 5 минг доллар пора билан ушланди
Мансабдор шахс кадастр ҳужжатларини юқори лавозимдаги танишлари орқали расмийлаштириб беришини айтган.
Тошкент вилоятида Давлат кадастрлари палатаси бошқармаси Бўстонлиқ туман филиалининг ходими 5 минг АҚШ доллари миқдорида пора олаётган вақтида қўлга олинди. Бу ҳақда Давлат хавфсизлик хизмати zamon.uzga хабар берди.
Маълум қилинишича, мансабдор шахс Бўстонлиқ туманида жойлашган 8 сотих ер майдонидаги хонадоннинг кадастр ҳужжатларини юқори лавозимдаги танишлари орқали расмийлаштириб бериш эвазига 5 минг доллар талаб қилган.
Давлат хавфсизлик хизмати Тошкент вилояти бошқармаси, Иқтисодий жиноятларга қарши курашиш департаменти ва Ички ишлар органлари ходимлари ҳамкорлигида ўтказилган тезкор тадбирда ходим сўралган пулни олган пайтда ушланди. Ашёвий далиллар ҳуқуқни муҳофаза қилиш органларига топширилди.
Ҳозирда мазкур шахсга нисбатан Ўзбекистон Республикаси Жиноят кодексининг 168-моддаси 2-қисми «а», «б» бандлари ва 28, 211-моддаси 1-қисми бўйича жиноят иши қўзғатилган ва тергов ҳаракатлари олиб борилмоқда.
