NBC telekanali ma’lumotlariga ko‘ra, suhbat davomida Isroil bosh vaziri Netanyaxu G‘azodagi ocharchilik haqida tarqalgan ma’lumotlarni yolg‘on va Xamas harakati tomonidan tarqatilgan propaganda deb atadi. Bu bayonotga javoban prezident Tramp o‘z noroziligini bildirib, Netanyaxu gapini bo‘lib, unga “ocharchilik mavjudligini inkor qilmaslikni” talab qilgani aytilmoqda.
Tramp, shuningdek, yordamchilari tomonidan taqdim etilgan, G‘azoda och qolayotgan bolalar haqidagi dalillarni misol qilib keltirdi va bu vaziyatni “taqlid qilib bo‘lmaydigan haqiqiy ochlik” deb baholadi.
NBC xabariga ko‘ra, Oq uy bu telefon muloqotiga oid izoh berishdan bosh tortdi, ammo Amerika-Isroil tomonidan qo‘llab-quvvatlanayotgan yordam dasturlari G‘azo sektorida gumanitar vaziyatning jiddiyligidan xavotir bildirmoqda.
Isroil bosh vazirligi esa rasmiy bayonotida Tramp va Netanyaxu o‘rtasida janjal yuzaga kelgani haqidagi xabarlarni mutlaqo inkor etdi va bunday da’volarni “soxta” deb atadi.
Shu bilan birga, Isroil hukumati G‘azo sektorida keng ko‘lamli harbiy amaliyotlarni rejalashtirayotgani haqida ma’lumotlar mavjud bo‘lib, bu mintaqadagi vaziyatni yanada murakkablashtirmoqda.