Россиядаги муштлашувда ўзбекистонлик меҳнат мигрантларининг иштироки ўрганилиб уларга ҳуқуқий кўмак берилади
Ижтимоий тармоқларда Россиянинг Москва шаҳрида турли миллат вакиллари иштирокида этник оммавий муштлашув юз бергани ҳақида хабарлар тарқалмоқда.
Aввалроқ Москва вилоятидаги Одинсово ва Митиши шаҳарларида иккита оммавий тўқнашув бўлиб ўтгани ва норасмий маълумотларга кўра унда ўзбеклар ҳам иштирок этгани ҳақида хабар қилган эдик.
Шу муносабат билан Ташқи меҳнат миграцияси агентлиги Россияда бўлиб турган Ўзбекистон фуқароларига мурожат билан чиқди.
Унда айтилишича, Ташқи меҳнат миграцияси агентлиги ушбу муштлашувда ўзбекистонлик меҳнат мигрантларининг иштирокини ўрганиб, зарур ҳолатда юртдошларимиз ҳуқуқларини ҳимоя қилиш бўйича ўз ваколати доирасида барча чораларни кўради.
Шунингдек, агентлик ушбу давлатда бўлиб турган Ўзбекистон фуқароларидан бундай оммавий муштлашувларда иштирок этмасликни, муаммоли ёки низоли вазиятларда ваколатли органлар ҳамда мамлакатимизнинг ушбу давлатдаги дипломатик идораларига мурожаат қилишни, Россия қонунларига риоя этишни сўрайди.
“Эслатиб ўтамиз, оммавий муштлашувларда иштирок этиш чет эл фуқаролари учун Россия қонунларига мувофиқ жавобгарликка тортилиш ёки давлатдан мажбурий чиқариб юборишга олиб келиши мумкин”, - дейилади хабарда.
