Афғонистон: икки вилоятда тўқнашувлар авж олмоқда, “Толибон” яна бир йирик шаҳарни эгаллади
Ҳукумат қўшинлари иккита туманни қайтариб олди.
Афғонистон ҳукумати кучлари Толиқон шаҳри яқинидаги икки туманни “Толибон”дан қайтариб олди.
TOLOnews нашрининг хабар беришича, Васаж ва Фархор туманлари жангарилардан озод қилинган. Буни Афғонистон Ички ишлар вазирлиги ҳам тасдиқлади.
Яна икки вилоятда “Толибон” ҳужумлари авж олди
“Толибон” Саманган ва Балх вилоятларига ҳужумни давом эттирмоқда. Саманган вилоятида Афғонистон парламенти собиқ аъзоси Муҳаммад Асиф Азимий бошчилигидаги 150 аскар “Толибон”лар тарафига ўтиб кетди. “Толибон” ҳозирда вилоят маркази бўлган Ойбоқ шаҳридан уч километр узоқликда турибди. Ҳаракат расмий вакили Забиҳулло Мужоҳид Ойбоқ шаҳри тўлиқ эгалланганини маълум қилди.
Балх вилоятидаги Ҳазрати-Султон тумани жангарилар томонидан босиб олинди. Афғонистон Мудофаа вазирлиги расмий вакили Фавод Омоннинг маълум қилишича, ҳукумат қўшинларининг махсус қисмлари Балх маркази Мозори Шариф шаҳрига қилинган ҳужумларни қайтаришга муваффақ бўлган. Балх вилояти Ўзбекистон чегараларига яқин жойлашган.
Дўстум тобора фаоллашмоқда
Сўнгги кунларда маршал Абдулрашид Дўстумнинг Афғонистон ҳарбий-сиёсий ҳаётида фаоллашувини кузатиш мумкин. 8 август куни Дўстум мудофаа вазири Бисмиллохон Муҳаммадий билан учрашгани хабар қилинган эди. 9 август куни маршал Фарёб вилояти расмийлари билан телефонда мулоқот қилди. Дўстум вилоятга қурол-яроғ етказишни кўпайтиришни айтган.
Замир Кобулов: Афғонистонда мувозанат ўрнатилади
РФ Президентининг Афғонистон масаласи бўйича махсус вакили Замир Кабулов “Толибон” кўп ҳудудларни эгаллаётганига қарамай, тез орада мамлакат ҳудудида мувозанат ўрнатилиши мумкинлигини билдирди. Унинг сўзларига кўра, 11августда Доҳада Россия, АҚШ, Покистон ва Хитой вакиллари иштирокида бўлиб ўтадиган учрашувда “Толибон” олиб бораётган ҳаракатлар муҳокама қилинади.
Афғонистонда вазият АҚШ ва НАТО қўшинлари олиб чиқилиши ортидан кескинлашди. Ҳукумат ва “Толибон”лар ўртасида тўқнашувлар тобора авж олмоқда.
Жаҳонгир Қўзиев
