Дунё етакчилари Афғонистондаги кейинги воқеалар хусусида ўз муносабатини билдирмоқда
Дунё етакчилари Афғонистондан америкалик ҳарбийлар олиб чиқилганидан кейинги воқеалар ривожидан ҳафсаласи пир бўлганини билдирмоқда.
Буюк Британия бош вазири Борис Жонсон бунда тўғридан-тўғри АҚШ Президенти Жо Байденни айблади.
“АҚШнинг Афғонистондан чиқиш қарори воқеаларни тезлаштириб юборди, дейиш адолатдан бўлади, аммо бу воқеалар кўп жиҳатдан кутилган эди”, —деди у.
Буюк Британия ҳукумати раҳбари ғарб етакчиларини Афғонистоннинг “терроризм учун озуқа манбаига айланишининг” олдини олишга чақирди.
“Афғонлар учун 2001 йилги ҳолатга қайтиш манфаатли бўлади, деб ўйламайман”, — деди Жонсон.
Борис Жонсоннинг фикрича, “Толибон”ни қонуний ҳаракат сифатида тан олинишига йўл қўйиб бўлмайди.
Канада бош вазири Жастин Трюдо ҳам инқирозни шарҳлаб туриб, қайғуда эканини билдирди. Шунингдек, у расмий Оттава анчадан бери Кобул билан мамлакатдаги элчихонасини ёпиб, алоқасини узганини таъкидлади.
Австралия бош вазири Скотт Моррисон сиёсий муҳокамаларга аралашмай, ҳукумати ғарбий иттифоқчилар билан ҳамкорлик қилган афғонларни эвакуация қилиш бўйича кучларни икки баравар оширишини айтди. Моррисон 400 нафар афғон Австралияга эвакуация қилингани, бу рақам тез орада кўпайишини айтиб ўтди.
Эслатиб ўтамиз, АҚШ собиқ президенти Дональд Трамп Жо Байденни Афғонистондаги вазият туфайли истеъфога чиқишга чақирганини хабар қилган эдик.
Шарофат Маҳмудова
