Россия Мудофаа вазирлиги Афғонистондаги Ўзбекистон фуқароларини эвакуация қилади
Россия Мудофаа вазирлиги мамлакат президенти Владимир Путиннинг кўрсатмасига биноан Афғонистондаги 500 дан ортиқ Россия, ОДКБ (Коллектив хавфсизлик шартномаси ташкилоти) ва Украина фуқароларини эвакуация қилади. Бу ҳақда вазирликка таяниб, «ТАСС» хабар берди.
Маълум қилинишича, ушбу операцияни амалга оширишда ҳарбий транспорт авиациясининг тўртта самолётидан фойдаланилади.
«25 август куни Россия президенти Владимир Путиннинг мудофаа вазири Сергей Шойгуга берган кўрсатмасига биноан Афғонистон ҳудудидаги Россия, ОДКБга аъзо-давлатлар (Беларусь, Қирғизистон, Тожикистон ва Ўзбекистон) ва Украинанинг 500 дан ортиқ фуқароларини ҳарбий транспорт авиацияси самолётлари ёрдамида эвакуация қилиш ташкиллаштирилади», — дейилади хабарда.
Таъкидлаш керакки, Ўзбекистон Коллектив хавфсизлик шартномаси ташкилоти аъзоси ҳисобланмайди. Ўтган вақт давомида Ўзбекистон ОДКБ таркибидан икки марта чиқиб кетган — дастлаб 1999 йил 2 апрелида (Грузия ва Озарбайжон билан бирга), кейин 2012 йил 28 июнида (ташкилотга 2006 йил августида қайта қўшилган). Ташқи ишлар вазирлигининг 2012 йил июнидаги баёнотида шартномадан чиқишнинг аниқ сабаб ва омиллари ташкилот котибиятига маълум қилингани айтилган эди.
Эслатиб ўтамиз, аввалроқ Афғонистондаги Ўзбекистон фуқаролари тўлиқ эвакуация қилингани тўғрисида хабар берилганди.
