Конгрессмен Лорен Боберт: "Уйғон, Жо. Сен истеъфо тўғрисидаги хатга имзо қўйишинг керак"
АҚШ Президенти Жо Байденнинг Исроил бош вазири Нафтали Беннет билан учрашувидан ёзиб олинган видеотасвир интернетда шов-шувга айланди.
Видео АҚШ Конгресси вакилларининг танқидига сабаб бўлди. Бу ҳақда “International Business Times” нашри хабар қилмоқда.
"Видеотасвир ижтимоий тармоқларда тез тарқалди. Байденни учрашув чоғида ухлаб қолганликда айблаётганлар орасида республикачи конгрессмен Лорен Боберт етакчилик қилмоқда", — дейилади газета хабарида.
Боберт ўз Twitter'ида "Уйғон, Жо. Сен истеъфо тўғрисидаги хатга имзо қўйишинг керак", — деб ёзиб қолдирган.
"Зудлик билан Жо Байденни олиб ташланг. Мамлакатимиз Исроил бош вазири билан учрашув вақтида тетик тура олмайдиган одам назорати остида экан, у хавф остида", — деб фикр билдирган Тейлор Грин.
Конгрессмен Тейлор Грин олдинроқ Жо Байденга бирданига учта импичмент беришни таклиф қилган эди.
Видеотасвирда Беннет Байденга АҚШ ва Исроил муносабатларининг янги бўлими ҳақида гапираётганида АҚШ Президенти бошини қуйи солиб, қўлларини бирлаштириб ўтиргани тасвирланган.
Сайлов олди кампанияси вақтида собиқ президент Дональд Трамп ҳам Байденни "уйқучи Жо" деб атаган эди.
