АҚШнинг Афғонистондан чиқиб кетиши уруш тугашини англатмайди

 

 

“The Washington Post” нашрининг фикрича, АҚШ қўшинларининг чиқиб кетиши Афғонистонда уруш тугашини англатмайди.

 

Вашингтоннинг Афғонистонни тарк этиши унинг ушбу ҳудуддаги 20 йиллик иштирокига барҳам бериши ва Америка ҳукуматини бу муаммодан қутқариши лозим эди. Аммо охир-оқибат Байден маъмурияти янада қийин вазиятга тушиб қолиши мумкин.

 

Масалан, ҳозирнинг ўзидаёқ Байденнинг Кобулдан барча америкалик ва улар билан ҳамкорлик қилган афғонистонликларни тезкор эвакуациясини ташкил қила олмагани қаттиқ танқид қилинмоқда. Шунингдек, қўшинларни тизимсиз олиб чиқиш, Кобул аэропортидаги терактда 13 АҚШ ҳарбийининг ҳалок бўлиши Ппрезидентнинг бошқарувчанлик салоҳиятини ва Афғонистондаги тинчлик ва осойишталик тикланиши ҳақидаги баёнотларини шубҳа остига қўяди. Шунингдек, “Толибон”нинг Афғонистонни бошқара олиши ва берган ваъдалари — аёллар ҳуқуқини чекламаслик ҳамда АҚШ билан ҳамкорлик қилган афғонларни таъқиб қилмасликка амал қилиши ҳам нечоғлик ҳақиқатлиги ноаёнлигича қолмоқда.

 

Ҳозирда Оқ Уй олдида икки муаммо бор. Биринчиси, минглаб афғон қочқинлари қиёфасидаги гуманитар инқироз. Иккинчиси, террор хавфининг ошиши. Турли террорчи гуруҳлар яна Афғонистонда эркин ҳаракат қилишни бошлаши мумкин. “Урушни шунчаки тугатишнинг ўзи  етарли эмас. Сиз вужудга келган оқибатларни бартараф қилаётганингизни намойиш қилишингиз керак”, — деган Барак Обама маъмурияти собиқ амалдори Бен Роудс.

 

Ўз навбатида, Аmerican Enterprise Institute тадқиқот маркази катта илмий ходими Даниэль Плетка вужудга келган вазият Байден ҳукумати учун фуқароларнинг унга бўлган умумий муносабатини белгилайдиган бурилиш нуқтаси бўлишини тахмин қилган. Унинг фикрича, “Байденнинг омади келса, у янги Жимми Картер (АҚШнинг 39- Президенти, Тинчлик учун “Нобель” мукофоти соҳиби-zamon.uz изоҳи)га айланади. Агар омад юз ўгирса, янги 11 сентябрь содир бўлади”.

 

“The Washington Post” Президентнинг Республикачилар партиясидаги рақиблари мавжуд муаммолар — коронавирус билан боғлиқ вазият, Афғонистонни тарк этиш ва бошқалардан фойдаланиб қолиши ҳамда бўлажак сайловларда позициясини мустаҳкамлаб олиши мумкин. Шунингдек, Афғонистондаги вазият АҚШ давлвт котиби Энтони Блинкен ва Миллий хавфсизлик бўйича маслаҳатчи Жейк Салливаннинг лавозимидан айрилишига сабаб бўлиши мумкин.

 

Эслатиб ўтамиз, бундан аввал сенатор Линдси Грем Афғонистонни тарк этиш АҚШда терактлар хавфини оширишини маълум қилган эди.

 

 

Жаҳонгир Қўзиев