"Толибон" ҳаракати Афғонистонда янги ҳукумат тузмоқда
Кобул аэропорти устидан тўлиқ назоратни қўлга олган толиблар янги ҳукумат шаҳли ва таркиби ҳақида эълон қилишга тайёргарлик кўрмоқда.
TOLO News телеканали хабарига кўра, вазирлар маҳкамасига мулла Ҳибатулла Охундзода раҳбарлик қилиши мумкин. У ҳеч қачон оммавий чиқиш қилмаган ва унинг турар жойи доим сир сақланади.
Khaama press агентлиги эса Ташқи ишлар вазири мулла Абдул Ғани Бародар бўлишини тахмин қилмоқда. У ҳаракат асосчиларидан бири бўлиб, ҳозир "толибон" сиёсий офисига раҳбарлик қилади. "Толибон"нинг биринчи раҳбарининг ўғли мулла Ёқуб мудофаа вазири, яна бир етакчи - Жалолиддин Хакканининг ўғли Халиф ички ишлар вазири бўлиши кутилмоқда.
БМТ "толибон"ни бир неча марта инклюзив ҳукумат шакллантиришга чақирган. Аммо Al Jazeera телеканали маълумотига кўра, вазирлар маҳкамасига олдинги аъзолар ва аёллар чақирилмайди.
"Толибон" ҳукумати 3 сентябрга қадар тўлиқ шакллантирилиши кутилмоқда.
Эслатиб ўтамиз, Афғонистон Ислом Партияси раҳбари Гулбиддин Ҳикматёр “Толиблар инклюзив ҳукумат тузишга тайёр”, дея таъкидлаганди.
Аввалроқ Афғонистон собиқ вице-президенти Амрулла Солиҳ “Толибон” диктатурасига қарши эканини маълум қилган эди.
Шарофат Маҳмудова
