АҚШда 11 сентябрь терактига оид ҳужжатлар ошкор қилинади
Президент шунга оид қарор имзолаган. “9/11 терактларининг 20 йиллиги арафасида ҳукуматга хужумлар хақида маълум бўлган барча нарсани америка халқи ҳам билиши лозим”, дейилади ҳужжатда.
Ҳукумат имкон қадар шаффофликни таъминлаши ва алоҳида олинган ҳолатлардагина махфийликни сақлаб қолиши зарурлиги таъкидланган. Байден АҚШ бош прокурори, адлия вазирлиги ва бошқа маъсул ташкилотларга ҳужжатларни таҳлил қилиш ва ошкор қилинганларини 6 ой ичида эълон қилишни буюрган.
Оқ Уй президентнинг шу ҳақдаги баёнотини тарқатди. Ундайтилишича, “Бугун АҚШ адлия вазирлиги ва бошқа масъул идораларга ФҚБнинг 11 сентябрга оид суриштирувларига тегишли ҳужжатларни ошкор қилишни назоратга олишга доир қарорни имзоладим. Унда бош прокурор махфийликдан чиқарилган маълумотларни 6 ой ичида ошкор қилиши кераклиги кўрсатилган” .
Байден президент лавозимига киришаётганда терактга оид ҳужжаатларнинг бир қисмини ошкор қилиш масъулиятини олганлигини таъкидлади. “Ушбу фожианинг 20 йиллиги арафасида мен бу мажбуриятимни бажардим”, деб қайд этган АҚШ етакчиси. Президентлик кампанияси пайтида бу Байденнинг сайловолди ваъдаларидан бири бўлган.
Маълумот ўрнида: 2001 йил 11 сентябрь куни АҚШнинг Нью-Йорк ва Вашингтон шаҳарларида теракт содир этилган. Нью-Йоркда “эгизак миноралар” портлаши оқибатида уч мингдан зиёд инсон ҳалок бўлган. Терактга асосий айбдор сифатида “Ал-Қоида ” кўрсатилган.
Эслатиб ўтамиз, бундан аввал сенатор Линдси Грэм 11 сентябрь терактлари қайтарилиши мумкинлигидан огоҳлантирган эди .
