АҚШ ҳукумати вояга етмаган қизларга уйланган афғонларга нисбатан суриштирув бошлади

 

 

CBC News нашрининг маълумотларига кўра, ҳозирда БААдаги АҚШ базаларида бўлиб турган баъзи афғон қизлари  мамлакатни тарк этиши учун ҳатто Кобул аэропорти остонасида никоҳдан ўтишга мажбурланган.

 

Расмийлар бу каби ҳолатларни одам савдоси сифатида баҳоламоқда.

 

Давлат департаментининг юқори мартабали амалдори бу маълумотлар Вашингтон томонидан жиддий қабул қилинганини  таъкидлади. Ҳозирда дастлабки суриштирув ишлари бошланган. АҚШда одам савдоси федерал даражада ҳам, алоҳида олинган штатлар даражасида ҳам оғир жиноятлардан бири саналади. Шу билан бирга ҳозирча вояга етмаганларга уйланган афғонларга қандай жазо қўлланилиши борасида аниқ тўхтамга келинмаган.

 

15 август куни Кобул шаҳри “Толибон” томонидан жангсиз эгалланди. Шундан кейин хорижий давлатлар фуқаролари ва улар билан ҳамкорлик қилган афғонларни эвакуация қилиш бошланган. 100 минглаб афғонистонликлар мамлакатни тарк этишган.

 

АҚШга эвакуация қилинган афғонларнинг 100га яқини турли террорчи гуруҳларга алоқадор экани маълум бўлган. Шунингдек, Берлинда 5 сентябрь куни эвакуация қилинганлардан бири 2 кишини пичоқлагани хабар қилинган эди.

 

Аввалроқ  БМТ Афғонистонга ёрдам беришни давом эттиришга ваъда берди.

 

 

Жаҳонгир Қўзиев