БМТ координатори Мартин Гриффитс Мулла Абдулғани Бародар билан учрашди
5 сентябрь куни Кобулга БМТ Бош котибининг гуманитар масалалар бўйича ўринбосари ва фавқулодда ёрдам координатори Мартин Гриффитс ташриф буюрди. Бу ҳақда ҳаракат вакили Муҳаммад Наим хабар берган.
Гриффитс толиблар сиёсий қаноти етакчиси Мулла Абдулғани Бародар билан учрашган. Ҳаракатнинг яна бир вакили Суҳайл Шаҳиннинг маълум қилишича, БМТ гуманитар ёрдам беришни давом эттиради.
“БМТ делегацияси афғон халқига гуманитар ёрдам беришни давом эттиришга ваъда берди. Афғонистонга давомий кўмак бериш масаласи ҳомий давлатларнинг кейинги учрашувида кўтарилади. Ислом амирлиги делегацияси БМТга миннатдорчилик билдириб, ҳамкорликка ва зарур шароитлар яратиб беришга тайёрлигини маълум қилди”, деб қайд этган Шаҳин.
Маълумот ўрнида: АҚШ қўшинлари олиб чиқиб кетилиши ортидан Афғонистонда толиблар ҳужумлари кучайди. 2021 йил августда ҳаракат вилоятларни бирин-кетин босиб олди. “Толибон” 15 август куни Кобул шаҳрини жангсиз эгаллади. Ҳозирда Афғонистоннинг қуруқликдаги чегаралари тўлиқ толиблар назоратига ўтган. Фақат Панжшер вилояти қаршилик кўрсатиб, жанглар давом этмоқда. Бу ерда Аҳмад Масъуд бошчилигида Миллий қаршилик фронти тузилган.
Эслатиб ўтамиз, бундан аввал Афғонистон чуқур гуманитар инқироз ёқасида тургани хабар қилинган эди.
Жаҳонгир Қўзиев
