11 сентябрь терактлари ортида кимлар тургани қисман очиқланди
АҚШ махсус хизматлари 11 сентябрь терактларига оид янги маълумотларни тақдим этишда давом этмоқда. Бу галги ҳужжатлар терактлар ортида ким турганлиги тўғрисидаги саволга қисман жавоб берди.
Федерал қидирув бюроси маълумотларига кўра, террорчилар Саудия Арабистони юқори мартабали амалдорлари билан алоқада бўлган. Хусусан, прортлашни амалга оширишда қатнашган Наваф ал-Хазми ва Холид ал-Мидхор АҚШга 2000 йил кузида халқаро талабалар алмашинуви дастури доирасида кириб келган. Уларга мамлакатда узоқ йиллардан буён истиқомат қилаётган Умар ал-Байомий исмли саудиялик ёрдам берган. У юқоридаги 2 кишини пул ва уй-жой билан таъминлаб турган.
Умар ал-Байомий Саудия Арабистони элитаси билан бевосита боғлиқ бўлмаган, аммо у Лос-Анжелес консуллигида илиқ қабул қилинган. Консуллик ҳужжатларида у талаба сифатида қайд этилган. Самолётлар олиб қочилганидан икки ҳафта олдин у АҚШни тарк этган.
Бундан ташқари теракт ижрочилари Лос Анжелесдаги масжид имомларидан бири Фахад ал Тумайри билан бир неча бор учрашган. Тумайри устидан бундан аввал полицияга шикоят тушган. Лекин у 11 сентябрь воқеаларидан бир неча ҳафта олдин изсиз йўқолган.
“Террорчилар “Ал-Қоида” билан бир неча бор алоқага чиққан. Шунингдек, Саудия Арабистонининг алоҳида ташкилотлари билан мулоқот бўлган. Улар самолётни ўғирлашда молиявий ёки логистик жиҳатдан ёрдам берган бўлиши мумкин. Саудия Арабистони юқори доираларининг 11 сентябрь кунги портлашларга алоқадорлиги ҳақида аниқ далил йўқ” - дейилади ҳисоботда.
Маълумот ўрнида: 2001 йил 11 сентябрда Нью-Йоркдаги Жаҳон савдо маркази ва Вашингтондаги Мудофаа вазирлиги биносига самолётлар воситасида теракт уюштирилган. Оқибатда 3 мингга яқин инсон ҳалок бўлган.
Бундан аввал АҚШ Президенти Жозеф Байден терактга оид ҳужжатларни ошкор қилишга буйруқ берган эди.
Жаҳонгир Қўзиев
